ҲИФЗИ ҲУҚУҚ БА МАНЗИЛ: МАСЪАЛАҲОИ АМАЛИИ ҚОНУНГУЗОРӢ ВА АМАЛИЯИ ТАТБИҚИ ҚОНУН
30 июли соли 2026 дар бинои мақомоти Ваколатдор оид ба ҳуқуқи инсон дар доираи ҳамкориҳои мутақобилан судманди мақомот бо Ташкилоти ҷамъиятии «Ҳуқуқи дастрас» ва Муассисаи давлатии «Маркази ёрии ҳуқуқӣ»-и назди Вазорати адлияи Ҷумҳурии Тоҷикистон семинари амалии омӯзишӣ дар мавзуи «Ҳифзи ҳуқуқ ба манзил: масъалаҳои амалии қонунгузорӣ ва амалияи татбиқи қонун» баргузор гардид.
Ҳадафи асосии чорабинӣ аз баланд бардоштани сатҳи тахассусии мутахассисоне, ки ба аҳолӣ ёрии ҳуқуқӣ мерасонанд, инчунин такмили механизмҳои ҳифзи ҳуқуқи шаҳрвандон ба манзил иборат буд.
Семинар дар доираи татбиқи Стратегияи миллии Ҷумҳурии Тоҷикистон дар соҳаи ҳифзи ҳуқуқи инсон барои давраи то соли 2038, ки бо қарори Ҳукумати Ҷумҳурии Тоҷикистон аз 5 августи соли 2023 таҳти № 357 тасдиқ шудааст, баргузор гардид.
Дар ҷараёни чорабинӣ ба масъалаҳои таъмини кафолатҳои ҳуқуқ ба манзили муносиб, кӯчонидани шаҳрвандон, пардохти ҷуброн ҳангоми вайрон намудани манзил, инчунин риояи ҳуқуқи инсон ҳангоми татбиқи лоиҳаҳои шаҳрсозӣ диққати махсус дода шуд.
Мудирии семинарро сардори шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангии Дастгоҳи Ваколатдор оид ба ҳуқуқи инсон дар Ҷумҳурии Тоҷикистон Шарифзода Талабшоҳ Акрам ба уҳда дошт.
Дар кори семинар 20 нафар намояндагон аз Дастгоҳи Ваколатдор оид ба ҳуқуқи инсон дар Ҷумҳурии Тоҷикистон ва Муассисаи давлатии «Маркази ёрии ҳуқуқӣ»-и назди Вазорати адлияи Ҷумҳурии Тоҷикистон иштирок намуданд.
Дар доираи панҷ ҷаласаи мавзуӣ иштирокчиён масъалаҳои мубрами татбиқи нақшаҳои генералии шаҳрҳо ва ҳифзи ҳуқуқи шаҳрвандон ба манзил, кафолатҳои ҳуқуқӣ ҳангоми вайрон намудани манзил ва кӯчонидани шаҳрвандон, механизмҳои ҳуқуқии иштироки шаҳрвандон дар сохтмони ҳиссагӣ, хусусиятҳои бастани созишномаҳо бо сохтмончиён, бақайдгирии давлатии молу мулки ғайриманқул, инчунин амалияи татбиқи қонунгузорӣ ва механизмҳои муосири ҳифзи ҳуқуқ ба манзили муносибро мавриди баррасӣ қарор доданд.
Дар ҷамъбасти чорабинӣ иштирокчиён аҳаммияти баланди амалии семинарро таъкид намуда, таҷрибаи касбии худро мубодила карданд ва тавсияҳоеро барои такмили ҳифзи ҳуқуқи шаҳрвандон ба манзил таҳия намуданд. Аз ҷумла, зарурати рушди минбаъдаи ҳамкории байниидоравӣ, баргузор намудани чорабиниҳои махсуси омӯзишӣ, таҳияи тавсияҳои амалӣ барои мутахассисон ва тақвияти корҳои иттилоотию ҳуқуқӣ миёни аҳолӣ таъкид гардид.
Баргузории чунин чорабиниҳо ба таҳкими иқтидори касбии мутахассисоне, ки ба аҳолӣ ёрии ҳуқуқӣ мерасонанд, такмили амалияи татбиқи қонунгузорӣ ва баланд бардоштани самаранокии ҳифзи ҳуқуқи инсон ба манзили муносиб дар Ҷумҳурии Тоҷикистон мусоидат менамояд.
www.ombudsman.tj
