Дар асоси дастури Роҳбари Дастгоҳи иҷроияи Президенти Ҷумҳурии Тоҷикистон №32/10-7947 аз 15 феврали соли 2023 ва иҷроиши банди 106-и Барномаи амали мақомоти Ваколатдор оид ба ҳуқуқи инсон барои соли 2026 ҷиҳати шарҳу эзоҳи Қонуни Ҷумҳурии Тоҷикистон “Дар бораи баробарӣ ва барҳам додани ҳама гуна шаклҳои табъиз” санаи 22 июни соли 2026 дар ноҳияи Айнӣ ва 24 июни соли 2026 дар шаҳри Панҷакенти Вилояти Суғд чорабиниҳои иттилоотӣ бо иштироки беш аз 400 нафар доир гардиданд.
Чорабинӣ бо ҳузури раисони шаҳру ноҳияҳо ва кормандони мақомоти иҷроияи ҳокимияти давлатӣ, кормандони мақомоти ҳифзи ҳуқуқ, раисону кормандони ҷамотҳои шаҳраку деҳот, сармуҳаррирони рӯзномаҳои маҳаллӣ, хабарнигорон, кормандони соҳаи маориф, фаҳанг, кормандони муассисаҳои таълимӣ, кор бо ҷавонон ва варзиш, кор бо занон ва оила, кормандони соҳаи тиб ва ҳифзи иҷтимоӣ, ходимони дин, фаъолони ҷамъиятии ноҳияҳо баргузор гардид.
Чорабиниҳои мазкур аз ҷониби раисони шаҳру ноҳияҳо ифтитоҳ ёфта, Ваколатдор оид ба ҳуқуқи инсон дар Ҷумҳурии Тоҷикистон Бобозода У. дар мавзӯи мақомоти Ваколатдор оид ба ҳуқуқи инсон дар Ҷумҳурии Тоҷикистон – ниҳоди миллии ҳифзи ҳуқуқи инсон ва зарурати қабули Қонуни Ҷумҳурии Тоҷикистон “Дар бораи баробарӣ ва барҳам додани ҳама гуна шаклҳои табъиз”, тарзи пешниҳоди ҳисоботҳо вобаста ба масъалаҳои табъиз ба мақоми амалисози Қонун баромад намуда, аз мақомотҳои иҷроияи ҳокимияти давлатии ноҳияҳо хоҳиш намуд, ки ба аҳолӣ мазмун ва моҳияти Қонуни нав фаҳмонида шуда, дар фаъолият масъалаҳои табъиз алоҳида аз дигар масъалаҳо баррасӣ гардида, ба пешниҳоди ҳисоботҳои ҳолатҳои табъиз ва нобаробарӣ диққати махсус зоҳир гардад.
Сипас, Маҷидзода П. – сардори шуъбаи ҳифзи давлатии ҳуқуқ ба баробарӣ ва озодӣ аз табъиз дар мавзӯи “Шарҳи мафҳумҳои Қонуни Ҷумҳурии Тоҷикистон “Дар бораи баробарӣ ва барҳам додани ҳама гуна шаклҳои табъиз” суханронӣ намуд.
Дар рафти чорабиниҳо аз ҷониби иштирокчиён саволҳо оиди гузаронидани экспертизаи зиддитабъизии лоиҳаҳои санадҳои меъёрии ҳуқуқӣ аз ҷониби Ваколатдор оид ба ҳуқуқи инсон дар Ҷумҳурии Тоҷикистон, андешидани чораҳо ҷиҳати оштикунонии тарафҳо дар ҳолати ба қайд гирифтани табъиз ва ваколати мақомоти давлатӣ ва мақомоти худидоракунии шаҳрак ва деҳот оид ба таъмини баробарӣ ва барҳам додани ҳама гуна шаклҳои табъиз дода шуданд.
Вобаста ба саволҳои додашуда аз ҷониби баромадкунандагон посухҳои мушаххас ва маслиҳатҳои ҳуқуқӣ дода шуд.
Дар фарҷоми чорабинҳо раисони шаҳру ноҳияҳои номбурдашуда ба мақомоти Ваколатдор оид ба ҳуқуқи инсон дар Ҷумҳурии Тоҷикистон барои доир намудани чунин ҳамоиши мутақобилан судманд миннатдорӣ ва омодагии худро барои ҳамкориҳои минбаъда иброз намуданд.
www.ombudsman.tj
